Salta al contenuto

30 agosto 2021


  Ξ Gennaro Agrillo » Salotto Napoletano » 30 agosto 2021  

(William John Hennessy – The Pride of Dijon – 1879)

Oi benedittu core! …
di Salvatore Di Giacomo in «Poesie» (Edizioni Bideri)

‘Na pèrgula, p’ ‘o ffrisco, quann’ ‘o sole

dint’ ‘a cuntrora, ‘e fuoco se faceva …
‘Na loggia, e, for’ ‘a loggia, doie figliole,
l’una cantava e ll’ata ca senteva …

E chistu core, (oi beneditto core!)
ca s’era ‘nnammurato ‘e chi cantava,
e ca stimava chella ca senteva …

Cantava a stesa, e quanno ‘na canzone
era cchiù malinconica e amirosa,
guardava a mme, pe’ … cumbinazione,
e receva … accussì, pe’ ffa’ ‘na cosa!

E chistu core, (oi beneditto core!)
metteva nu penziero p’ogne stesa,

e ‘na speranza p’ogne pizzo a riso!

E mme dicette chella ch’io stimava:
«Si tu sapisse quanto te vo’ bene!
ma tene ‘na catena … (e suspirava …)
ch’è tale e quale a chella ca tu tiene! …»

… ‘O ssiente? … ‘O ssiente, (oi benedittu core!)
Pe’ nnuie so’ sempe làcreme a ‘stu munno!
. . . . . . . . . . . . . . . . . . . . . . . . . .
Ringrazia a ‘sta figliola e gghiammuncénne! …



Claudio Carluccio (chitarra e voce) e Nicola Mormone (chitarra)

‘E TREZZE ‘E CARULINA
(musica: Salvatore Gambardella – testo: Salvatore Di Giacomo – 1895)

Oje pétteno ca piéttene
‘e trezze ‘e Carulina ,
damme nu sfizio, scíppala
scíppala na matina…

E tu specchio addó’ lùceno
chill’uocchie addó’ cantanno
ride e se ‘mmira, appánnete
quanno se sta ammiranno…

Lenzole addó’ se stènnono
‘e ccarne soje gentile,
‘nfucáteve, pugnítela,
tutto stu mese ‘abbrile…

e vuje teste d’anèpeta,
d’aruta e ‘e resedá,
seccáte ‘ncopp’a ll’ásteco
facíteve truvá…

Ma ‘o pétteno ca péttena
‘e trezze ‘e Carulina ,
è sempe ‘o stesso pétteno
‘e tartaruga fina
‘o specchio è de Venezia
e nun ha fatto mosse,
‘e llenzulelle smòveno
n’addore ‘e spicaddossa…

E manco nun mme sentono
ll’aruta e ‘a resedá:
cchiù ampresso ‘ncopp’a ll’asteco
abbrile ‘e ffa schiuppá…

E sti scungiure, è inutile,
nn”a pònno cchiù arrevá:
Cchiù ‘nfama e cchiù simpatica,
cchiù bella assaje se fa!


https://lazzaronapoletano.it/wp-content/uploads/2021/12/Woldemar-Kaden-Notte-destate-a-Posillipo-1877.jpg
(Woldemar Kaden – Notte d’estate a Posillipo – 1877)

Sunnanno Pusilleco
di Nando Clemente in «’E ppazzielle» (Edizioni 2000)

Uocchie pittate dint’ ‘o chiar’ ‘e luna,
mana che cerca e trova n’ata mana …
pòvera ‘argiento ca d’ ‘o cielo chiove
‘ncopp’a ‘na strata ‘nfosa ‘e sentimento …
ombre e suspire perze dint’ ‘o scuro,
suonno d’ ‘e furastiere, via stramana,
patria d’ammore mia napulitana!
Mana che tremma ‘ncopp’a ‘na chitarra,
palpito ‘e stelle, appuntamento azzurro …
chesto pe’ me, Pusilleco si’ tu …
pe’ me, ca spisso ‘a notte dint’ ‘o suonno,
chiagnenno cerco ‘a strata d’ ‘e vint’anne …
mo, ca si dint’ ‘o suonno ‘a notte chiagno,
chi mme scetava … nun esiste cchiù!