Salta al contenuto

‘E corne


  Ξ Lazzaro Napoletano » Storia, mito e … » Racconti Popolari » ‘E corne  

‘Nce steve na vota n’ommo, e pecché nun aveva che fà’ ‘mmiez”a via, se partette e se ne jette ncampagna.
Va a dà’ n’uocchio ‘ncopp’a n’arbere e truvaje nu nivo ‘aucielle. Sagliette ‘ncoppo e pigliaje ‘a mamma cu’ doje ove; e vicin’a cheste ‘nce steve na ‘scrizione che diceva: «Chi se mangia ‘o core ‘e chist’aucielle sarrà papa, e chi se mangia ‘o fecato avarrà na vorza ‘e cinquanta ducate ogne matina.»
Chill’ommo nun s’addunaje ‘e niente ‘e tutte chesti cose, e turnanne a casa, dicette ‘nfacci”a mugliera:
– Mò ‘st’aucielle che ne facimme? E figlie nuoste se morene ‘e famme. Mò ‘e porto a d”o cumpare e accussì facimme nu poco ‘e farenata p”e criature. – Jette a d”o cumpare e dicette:
– Cumpà’, v’aggio purtate chesti doje ove e chist’aucielle pe’ fà’ pazzià’ ‘e figlie vuoste. –
‘O cumpare dicette ca nun ‘e vuleve; ma isso se sfurzaje a ‘nce fà’ tené’, ‘nfin’a quanno ‘o cumpare ce ‘e facette purtà’ arete a viva forza.
Chill’ommo ‘nfuriate se pigliaje ‘aucielle e se ne fujette scurdannese ll’ove ‘ncopp’a ‘o tavulino d’’o cumpare.
Turnaje a casa e se mangiaje ‘aucielle. ‘O cumpare va a veré’ ‘ncopp’a ‘o tavulino, trova chelli doje ove e legge ‘a ‘scrizione.
– Oh malora! C’aggio fatto! Aggio fatto purtà’ ‘aucielle a ‘o cumpariello e ‘ncopp’a chest’ove ‘nce sta scritto tutto chesto. –
Corre a d”o chillo e le dicette ca ‘e criature soje s’erano mise a chiagnere pecché vulevano ‘aucielle.
Piglia l’ ommo e le rispunnette ca era arrivato troppo tarde e ca lloro se 1’avevene magnate; e ‘o core nu figlio e ‘o fecato n’auto.
‘O cumpare se ne turnaje a casa e dicette a ‘a mugliera:
– Mò- comm’avimma fà? –
‘A mugliera rispunnette ca se jesse a piglià’ ‘e criature dicenne ca s”e vuleve crescere isso.
‘O cumpare jette da chill’ommo e dicette:
– Cumparié’, voglio ‘sti duje piccerille tuoje pecché tu nun ‘e puo’ campà’. Mò t”e cresc’je. –
S’’e purtaje a casa e ‘e mannaje a scola. ‘A mugliera d’’o cumpare jeva a fà’ ‘o lietto ‘a matina a ‘e piccerille, e truvaje na vorza ‘e cinquanta ducate; pe’ chesto ‘e teneve cu’ molta accuglienza chille duje guagliune.
Doppo sei o sett’anne ca ‘o cumpare s’era fatte nu sacco ‘e renare e ‘sti piccerille s’erano fatte gruosse, na matina se ne jette a pazzià’ cu’ lloro dint’’o lietto; e pazzianne pazzianne; carette ‘nterra ‘a vorza ‘e cinquanta ducate.
‘E piccerille se n’addunajene e dicettere: – Ccà mò nun ce stamme cchiù buone. Chisto ‘o cumpare ha mise ‘sta vorza pe’ veré’ si nuje ‘nce pigliaveme ‘e renare. –
E ‘o juorno doppo dicettere a ‘o cumpare ca se ne vulevene j’. Chillo nun ‘e vuleve fà’ partì’; ma doppo tante parole ‘o cumpare le dette duiciente ducate a ognuno’ e lloro e ne facette j’.
‘E guagliune se ne jettene, e cammenann,e cammenanne, ‘a sera se truvajene dinto a nu bosco; e nun avenne addò se cuccà’, se mettettene ‘ncopp’a na cercula. Quanno fuje matina e se susettene, truvajene ‘a vorza ‘e cinquanta ducate.
– Ah, ‘o cumpare pe’ chesto ce vuleva tené, a casa soja, chesta è virtù ca tenimmo. – Dicettene ‘e duje frate.
Se mettettene ‘ncammino, e cammenanne cammenanne, arrivajene a nu puntone ‘e via. Uno ‘e lloro rimmanette nu poco arrete pe’ fà’ nu servizio. L’ato frate nun se n’addunaje, e accussì se sperdettene.
Chillo ca teneve ‘o preggio d’avé’ ‘a vorza ‘e cinquanta ducate ogne matina se truvaje a na città; e chillo c’aveva essere papa se truvaje a n’ata città; ma nun tenenne che mangià’ se mettette a fà’ ‘o sagrestano dint’a na chiesa.
Venette ‘o tiempo ca s’aveva fà’ ‘o papa dint’a chella città. Allora se menava na palomma pe’ vedé’ ‘ncap’a chi s’appujava. ‘Sta vota ‘a palomma s’appujaje ‘ncap’a ‘o sagrestano, e isso fuje papa.
Lassamme mò a chisto e pigliamme a chill’ ato frate ca teneve ‘o preggio d’’a vorza. Chisto se truvave a nu paese addò ce steve nu triato ca se pavavene cinquanta ducate ‘a sera.
‘A femmena ca faceva ‘o triato accuminciaje a penzà’:
– Chisto, chi signore sarrà, ca vene ogne sera ccà. –
Accussì, penzanne penzanne, dicette a na vecchia ruffiana ca teneve cu’ essa ‘e spià’ a chillo signore chi era. ‘A vecchia jette vicin’a ‘o signore e dicette:
– Vuje che pruprietà tenite, ca venite ogne sera a ‘o triato? –
Rispunnette ‘o giovane:
– Je tengo. na vorza ‘e cinquanta ducate ‘a matina. –
Piglia, ‘a femmena d’’o triato dicette vicin’a ‘a ruffiana c’avesse ditto a chillo giovene si se ‘a vuleve spusà’. Chesta ‘nce ‘o dicette, e ‘o giovene rispunnette:
– Chisto pure’ è ‘o piacere mio. –
E accussì ‘a femmena, ‘a sera appriesso, fenuto ‘o triato, ‘o vulette ‘ncopp’a do essa, e po’, a poco a poco, cu’ ‘e chiacchiere soje le tiraje ‘a vocca comm’isso aveva ‘sta vorza ogne matina. Isso, comm’a nu fesso, le facette accunoscere ca s’aveva magnato ‘o fecato ‘e n’auciello.
‘A femmena, sentenne chesto, ‘o ‘mmitaje a mangià’ a casa soja; e le dette a mangià’ na cosa ca le facette vummecà’ tutto chello c’aveve. mangiato, e pur’e chillo tale fecato.
Piglia, e ‘a femmena se mangiaje essa’ o fecato; e doppo ne cacciaje a chillo povero diavulo a dint”a casa soja.
Accussì essa aveve mò ‘a vorza ‘e cinquanta duca te ‘a matina e chillo no cchiù.
‘O pover’ommo dummanette ‘mniiez’a na via e nun teneve proprio che mangià’. Se ne jette ‘int’ a nu vuosco e se mettette a mangià’ evera comm’a n’animale.
Jette a dà’ n’uocchio a’ via ‘e coppa e vedette nu pere ‘e fiche contra tiempo. Se ne mangiaje una
e l’ascette nu cuorno ‘ncapo; se ne mangiaje n’ata e n’ato cuorno l’ascette. Se jette a vutà’ e s’addunaje ca ‘e corne ‘ntuppavene ‘nfacci’a ‘e frasche, e allora dicette:
– Mò aggio fatto ‘a ‘nzalata! Sulo ‘e corne ‘ncapo me mancavene, e chelle me songo asciute. –
‘Int’a ‘o stesso vuosco ‘nce steve na funtana; ‘o giovene se jette a fà’ na veppeta d’acqua, e subbeto se sanajene ‘e corne.
Penzaje, allora, e dicette: – Pure aggio truvato nu mezzo. –
Doppo le venette ‘o vulio ‘e se mangià’ nu poco ‘e ‘nzalata, e addeventaje ciuccio.
Se facette na veppeta d’acqua e addeventaje cristiano comme primma, e dicette:
– Aggio truvato duje mezzi, mò..-
S’accattaje na spasella, ‘a rignette ‘e fiche, s”a mettette ‘ncapo e passiave pe’ sott’a chillo palazzo addò steve ‘a signora che faceve ‘o triato, alluccanne:
– Fiche ‘e paraviso ‘e contra tiempo. –
S’affacciaje ‘a ruffiana e ‘nc’è facette accattà’ a ‘a padrona soja. E chill’ommo s’’e facette pavà’ na pezza ‘o ruotolo. ‘E mettettene for’a ‘a fenesta. Piglia ‘o servo, se ne mangiaje doje annascuso; e l’ascettene duje cuorne ‘ncapo. S’annascunnette pe’ nun se fà’ abberé’ cchiù d”a signora. ‘A serva pure s”e mangiaje, e pure a essa l’ascettene ‘e corne. Pur’essa se ‘nchiurette pe’ nun se fà’ abberé’.
‘A signora a inie zjuorno chiammaje ‘e sierve; ma nisciuno ‘e lloro ‘a rispunneva.
Piglia essa se mangiaje tutt”e fiche; e l’ascettene na vranche ‘e corne ‘ncapo.
Quanno se n’addunaje, accumminciaje a fà’ ‘a pazza.
Currettene allora ‘o servo e ‘a serva, e tutt”e tre se verettene cu’ e corne ‘ncapo. Se ‘nchiurettene dint’a ‘o palazzo e nun ascevene cchiù.
Facettene venì’ tanti miereche, ma nisciuno ‘nce sapette sanà’.
Chillo tal’ommo, a chisto punto, se rignette na buttigliella d’acqua e po’ fa dicere p’’ paese ca era venuto nu miereco furastiero ca sanava’ e corne.
‘A signora priesto, quanto çchiù putette, s’’ facette chiammà’ e le dicette:
– Dottò’, vuje m’avita sanà’, si putite, ‘sti. corne, pecché nun pozzo cchiù ghj’ a triato. –
– Si. – Rispunnette ‘o miereco. – Je ve voglio sanà’, ma voglio fà’ primma ‘o fatto d”a muneta. –
– Sissignore, basta ca me sanate, chello ca vulite je ve dongo. –
– M’avita dà’ cinchemile ducate. –
‘A signora ‘n’’e dette e isso se pigliaje tutte chilli denare.
Appriesso ascette ‘a vecchia ruffiana e dicette:
– Signo’, pe’ carità, je pure tengo ‘e corne e me voglio sanà’. –
Rispunnette ‘o miereco:
– Tu m’hé dà’ quattuciente ducate. –
E accussì se facette. Po’ ascette ‘o servo dicenne ca pur’isso vuleve essere sanato; e facenne ‘o patto, pavaje dujciente ducate.
Doppo ‘o miereco se ne jette. Se rignette na spasella ‘e chell’evera c’aveva fatto addeventà’ ciuccio a isso, e ‘a jeve vennenne pe’ sotto a ‘o barcone ‘’a signora.
Chesta, lesta lesta, s’accattaje l’evera. ‘o vennetore ce ne vulette fà’ mangià’ nu poco ‘nnante a isso. E accussì, subbeto, addeventaje na ciuccia. Le mettette ‘a capezza e strascenannele e strillanne ‘’a purtaje.
‘E chillo tiempo se steve fravecanne na chiesa ‘ncopp’a na muntagna, e ‘nce carriavene ‘e prete cu’ ‘e ciucce. Chill’ommo jette pur’isso, e vuleva fà’ sempe duje o tre viagge cchiù ‘e Il’ate pe’ maltrattà’ ‘a ciuccia soja.
L’ati cumpagne, ca stevene là a faticà’, purtajene spia a ‘o papa. ‘O papa mannaje a chiammà chisto giovene e l’addimannaje pecché maltrattave chella povera bestia.
Chillo, pe’ primma dicette ca ‘o faceva pe’ fà’ cchiù denare; ma po’ verenne ca ‘o papa nun ‘o vuleve crerere, le cuntaje tutt”o fatto e tutto chello che l’era succieso ‘a ca era nato.
‘O papa allora le facette cunoscere comm’isso era ‘o frate, e le .cummannaje ‘e dà’ a chella ciuccia chella tal’ acqua ca ‘a faceva addeventà’ n’ata vota femmena.
Accussì fuje fatto, e ‘e duje frate se stettere felice e cuntente ‘nzieme, doppo che ne mannajene a chella signora ‘e triato.