Salta al contenuto

‘O rre e ‘e carcerate


  Ξ Lazzaro Napoletano » Storia, mito e … » Racconti Popolari » ‘o rre e ‘e carcerate  

‘E tiempe antiche ‘ce steva nu re ca era ‘o primmo repassatore. Nu bello juorno le venette ‘ncapo ‘e j’ a truvà’ ‘e carcerate. Quanno arrivaje a ‘o carcere se facette mettere ‘e cundannate, uno ‘nfil’a n’ato, dint’a nu cammarone; po’ s’accustaje vicin’a ‘o primmo e le spiaje:
– Dimme ‘nu poco, pecchè staje cà dinto?
– Pe’ senza niente, Maistà, so’ ‘nnucente. – rispunnette chillo.
– Puveriello! – Sgrignaje ‘o re, e passaje appriesso.
– E tu ch’hè fatto? – addimannaje a ‘o siconno.
– Nun aggio fatto niente Maistà. c’è stato nu sbaglio ‘e tribunale. – rispunnette chist’ato.
E ‘a stessa cosa ‘o terzo; e pe’ nun v”a purtà’ a luongo, ‘e quante ce ne stevene dint’a chillo cammarone, nisciuno aveva fatto niente, erano tutte ‘nnucente.
L’urdemo d”a fila mò, era nu vicchiariello cu’ na faccia che pareva San Giuseppe, e che tutto se quartiava.
‘O re ‘o guardaje nu poco, e po’ l’addimannaje:
– E tu, accussì viecchio, che faje cà?
– Maistà. – dicette ‘o viecchio, e l’uocchie le lucechiavene – In vita mia nun me so’ fatto passà’ maje ‘a mosca p”o naso e tre n’aggio mannato all’ato munno!
– Ah. – facette ‘o re. – E staje ‘mmiez’a tutta ‘sta brava gente?
E avutatese a ‘e carceriere dicette: – Cacciate subbeto a chisto fore, ca cà dinto nun ‘o voglio.