Salta al contenuto

Mustaccio


  Ξ Lazzaro Napoletano » Storia, mito e … » Racconti Popolari » Mustaccio  

‘Nce steve na vota n’ommo ca se chiammave Mustaccio. Chisto era n’ommo nu poco ‘ncazzuso pecché aveva avuto na mala giuventù. Mò era turnato ‘a fà’ ‘o surdato e ghjeve truvanne na fatica pe’ campà’; ma ‘e tiempe erano triste e fatica nun se ne truvave. Nu juorno ‘ncuntraje p”a via nu bello signore ca cammenave accumpagnato ‘a n’ommo cchiù viecchio. S’accustaje e le spiaje si s”o vuleva piglià’ a faticà’ cu’ isso. ‘O signore l’addemandaje che sapeve fà’, e Mustaccio rispunnette ca isso era pronto a fà’ qualunqua cosa pure ‘e faticà’.
– Va bene, – dicette ‘o signore – vieni con noi. – E accussì Mustaccio se mettette a cammenà’ cu’ lloro. S’ha da sapé’ ca chillo signore era Gesù e chillo viecchio era san Pietro ca jevene p”o munno pe’ truvà: ‘e buone cristiane.
‘O signore, ca tutte chiammavene Maestro, aveva pigliato ‘nzimpatia a Mustaccio; e chesto aveva miso gelusia ‘ncuorpo a san Pietro. Nun passave juorno ca chisti duje nun se facevene n’appiccecata; e ‘o Maestro cu’ na santa pacienza metteve pace.
Nu juorno arrivajene ‘int’a nu paese a’ via ‘e miezijuorno; tenevene, famme e nun tenevene sorde. Allora ‘o Maestro dicette a san Pietro: – Pietro voi dal fornaio e chiedigli del pane. –
– Maestro, – rispunnette san Pietro – ma nuje nun tenimme manco nu sorde.
– E va bene. Allora vai tu Mustaccio.
Piglia e Mustaccio nun s”o fa’ dicere manco na vota e subbeto va a d”o furnaro.
Arrivato ca fuje, accumminciaje a penzà: «Nu mumento, ma addo sto ghjenne; chisto ‘o furnaro senza renare ‘o pane nun m”o da. Mò veco e m”o rubbà’.» S’accustaje vicino ‘a puteca e sturiave comme aveva fà’ p’arraffà’ nu pare ‘e pagnotte, quanno ‘o furnaro le spiaje: – Bello gio’, che vulisseve nu pare’ e pagnotte? E pigliatavelle cu’ na bbona salute.
Mustaccio dummanette meravigliato; se pigliaje ‘e pagnotte e turnaje a d”o Maestro. Chi sto le dicette: – Mustaccio, chi ti ha dato queste pagnotte? – Maestro, ‘o furnaro, comme avite ditto vuje. – S’avutaje san Pietro: – Ma comme po’ essere si nun tenive manca na lira! Tu si’ nu mariuolo, te l’hé arrubbate.
Rispunnette Mustaccio: – Nun è overo, me l’ha date ‘o furnaro. Embè san Pié’, pure va a feni’ ca nu juorno ‘e chisti te faccio na paliata.
– Basta, – dicette ‘o Maestro – Che non accadano mai più di queste storie. –
E accustannese a Mustaccio le dicette senza se fà’ sentì’ a san Pietro: – Quanto a te, Mustaccio, per questa volta ti perdono, ma in seguito non farti più venire il desiderio di rubare.
Mustaccio se facette ‘e croce. Penzava: «Comme ha fatto a sapé’ ca je ‘o pane m”o vuleve arrubbà’? ».
Basta, pe’ nun ‘a purtà’ a luongo, ‘o Maestro, san Pietro e Mustaccio, cuntinuajene a girà’ p”e paise, e tutte ‘e vote ca cercavene coccosa ‘a gente tutta cuntenta faceve a chi metteve ‘a coppa a rialà’.
– Nu juorno, arrivanne ‘int’a nu paese scunusciuto, ‘ncuntrajene n’ommo, ca prianne e chiagnienne dicette vicin’a ‘o Maestro:
-Venite, venite a casa mia. ‘A figlia mia sta murenne, vuje l’avita salvà’. –
Arrivate ca fujene, truvajene na bella figliola ‘int’a nu lietto ca era cchiù morta ca viva. Allora ‘o Maestro dicette:
– Per salvare tua figlia mi ci vuole un forno, della legna e un gran tavolo di marmo. –
‘O pover’ommo subbeto se dette ‘a fà’. Apparicchiaje ‘o furno, accatastaje ‘a legna e priparaje nu bello tavulo ‘e marmo. Po’ tutte se n’ascettene fore, e dint’a stanza rummanettene sulamente ‘o Maestro, san Pietro e Mustaccio. Chisto penzava: «Va trova mò chisto che vo’ fà’. »
Allora ‘o Maestro dicette: – Pietro accendi il fuoco, e tu Mustaccio prepara la legna. – Quanno dint’a ‘o furno se facette na bella lampa, ‘o Maestro dicette:
– Ed ora Mustaccio prendi la fanciulla e mettila nel forno. –
A chesti parole Mustaccio se sentette ‘e murì’. – Maestro, ma che dicite, fusseve asciute pazzo, mettere ‘a figliola ‘int’a ‘0 furno? Ca jammo a fernÌ’ tutte ‘ngalera. –
Rispunnette allora ‘o Maestro: – Uomo di poca fede. Pietro eseguisci. –
Allora san Pietro, senza paura, pigliaje ‘a figliola e ‘a menaje ‘int’a ‘o furno. ‘E lampe l’atturcigliajene e ‘int’a poco tiempo addeventaje cennere.
Allora ‘o Maestro pigliaje ‘sta cennere, ‘accucchiaje ‘ncopp’a ‘o tavulo e cu’ ‘a vocca ‘nce sciusciaje a coppa.
‘A ‘ntrasatta accumparette n’ata vota ‘a figliola tutta sana e cchiù bella ‘e primma.
Trasette ‘o pate ca p”a priezza chiagnieve, e se menaje a ‘e piere d”o Maestro.
Chisto ‘o facette sosere e le dicette:
– Vai con tua figlia e sii felice, perché hai avuto fede. –
E avutannese d”a parte ‘e Mustaccio e san Pietro dicette: – Su, andiamo! –
Mustaccio, nu poco meravigliato e nu poco penzeriuso, acalaje ‘a capa e ascette fore. Ma doppo nu poco’ e tiempo dicette vicin’ a ‘o Maestro ca isso mò se ne vuleve ‘j pe’ fatte d”e suje. ‘o Maestro le rispunnette ca le dispiaceve, ma ca si isso accussì vuleve se’ ne jesse.
E accussì Mustaccio se ne jette pe’ fatte d” e suje.
Nu juorno arrivanne ‘int’a nu paese ‘ncuntraje n’ommo ca chiagnieve pecché ‘a figlia soja steve murenne. Allora Mustaccio, arricurdannese d”o Maestro, dicette ‘nfacci’a chill’ommo ca isso ‘a puteve sanà’. Se facette apparicchià’ nu furno, ‘o lignammo e nu tavulo ‘e marmo, se ‘nchiurette dint’a stanza, e doppo ca dint’a ‘o furno se fuje fatte na bella lampa, pigliaje ‘a figliola e ‘nce ‘a menaje a dinto. Doppo accucchiaje ‘a cennere ‘ncopp”a tavula, ma comme jette pe’ sciuscià tutt”a cennere se sparpagliaje pe’ tutt”a stanza. Mustaccio ‘a turnaje ‘accucchià’, ma comme sciusciaje ‘a cennere turnaje a se sparpaglià’.
Allora Mustaccio accumminciaje a tremmà’ d”a paura; nun sapeve che fà’. S’affaéciaje a ‘a fenesta e verette ‘o Maestro ca passave ‘a luntano. Allora abbiaje a chiammà’: – Maestro, Maestro. –
Ma niente; ‘o Maestro nun senteve. E isso cchiù forte ancora: – Maestro, Maestro. –
Allora ‘o Maestro s’avutaje, e verenne a Mustaccio ‘n coppa a chella fenesta affacciato cu’ na . faccia tutta spaventata, s’accustaje e le spiaje che steve facenne.
Maestro aiutateme, aggio vulute fà’ comme vuje cu’ na figliola malata, ma ‘a cennere tutta se sparpaglia. –
Rispunnette ‘o Maestro: – Mustaccio, Mustaccio, tu combini sempre guai; meriteresti di non essere aiutato. Apri la porta e fammi entrare. –
Accussì ‘ o Maestro trasette, accucchiaje ‘a cennere ‘ncopp’a ‘o tavulo, sciusciaje e ‘a figliola accumparette sanata e cchiù bella ‘e primma.
Allora ‘o Maestro dicette: – E adesso caro Mustaccio ci dobbiamo dividere per sempre. Esprimi tre desideri, io te li concederò e tu andrai per la. tua via. –
S’avutaje san Pietro vicin’a Mustaccio: – Circhele ‘a salvazione ‘e l’anema. –
E Mustaccio: – Fatte ‘e fatte tuoje, vire si se sta zitto! –
– Maestro, je vurrja nu zaino ca quanno dico: «a nomme ‘e Dio chesto ‘int’a ‘o zaino mio» accussì ha da essere. –
– Ti sia concesso.
– Po’ vurrja nu pere ‘e fiche ca facesse ‘e fiche ogne stagione, e ca quanno uno ‘nce saglie a coppa e je dico « a nomme ‘e Dio chisto nun pozza cchiù scennere» accussì ha da essere. –
– Ti sia concesso. –
– Po’. vurrja nu scannetiello ca quanno uno s’assette a coppa e je dico « a nomme ‘e Dio chisto nun se pozza cchiù sosere » accussì ha da essere. –
– Ti sia concesso. –
E accussì Mustaccio se spartette d” o Maestro e se ne jette pe cunto suojo.
Nu juorno arrivaje ‘int’a nu paese e verette nu sacco ‘e gente ca facevene ammuina fore a ‘nu palazzo. Mustaccio spiaje ch’era succieso; e ‘a gente dicette ca ‘int’a chillo palazzo ce stevene ‘e riavule e ca ogne notte se sentevene rummore ‘e catene.
Mustaccio, ca nun se metteve appaura manco d”a morte, dicette: – ‘E voglio proprio abberé’ ‘sti riavule. ‘Sta notte ‘nce dorm’je ca dinto. –
Accussì, lassanne tutta chella gente meravigliata, Mustaccio trasette ‘int’a chillo palazzo, e truvata na stanza ca le piaceve, s’accunciaje ‘e cose soje e se mettette a durmì’.
Quanno fuje a via ‘e mezanotte s’accumminciajene a sentì’ remmure ‘e tutt”e manere, pareve ca ‘o palazzo se vulesse scarrupà’. Doppo accumminciajene remmure ‘e catene ca se facevene sempe cchiù forte. Mustaccio durmeve e nun se ‘mpurtave ‘e niente. Ma doppo ‘e rummure se facettene accussì forte ca Mustaccio se scetaje, e sfasteriato ca nun puteve cchiù durmì’, dicette: – A nomme ‘e Dio ‘e riavule ‘int’a ‘o zaino mio. –
E allora tutt”e riavule int’a manco nu minuto trasettene int’a ‘o zaino. Mustaccio nun perdette tiempo, aizaje ‘o zaino ‘ncuollo, ‘o purtaje a d”o ferraro, le facette mettere attuorno cierte chiastre ‘e fierro, e po’ cu na mazza accumminciaje a chiavà’ mazzate ‘a cecate.
‘E riavule ‘a ‘int’a ‘o zaino accumminciajene a alluccà’ pe’ ‘o delore e strillavene comme tanti pazze: – Maronna, sant’Anna, chisto ce sta rumpenne l’osse; basta, basta! –
Ma Mustaccio tanto ‘a fernette quanno se stancaje ‘e dà’ mazzate.
Quanno fuje cchiù tarde arapette ‘o zaino e ne facette ascì’ ‘e riavule ca subbeto se ne fujettene.
Passaje tanto tiempo e Mustaccio mò s’era fatto nu poco vicchiariello. Aveva truvato na casarella cu’ nu poco ‘e ciardeniello addò aveva piantato ‘o pere ‘e fiche ca l’aveva dato ‘o Maestro. Passave ‘e ghjurnate soje assettato ‘ncopp’a ‘o scannetiello ca pure aveva avuto d”o Maestro.
Nu bello juorno sentette ‘e tuzzulià’ a ‘a porta.
– Chi è? – s’avutaje Mustaccio.
– Songo ‘a Morte, e te so’ venuto a piglià’. –
– Pe’ tramente assiettete nu poco ‘ncopp’a ‘stu scanno. –
‘A morte, niente sapenne, s’assettaje, e comme Mustaccio ‘a verette dicette: – A nomme ‘e Dio’ a Morte nun se pozza sosere ‘a coppa’ o scanno. –
Quanno ‘a Morte jette pe’ s’aizà’, nun se puteve cchiù sosere; e allora Mustaccio cu’ nu pizzo a riso le dicette:
– Mò si nun me dai n’ati dieci anne ‘e vita tu a lloco ‘ncoppa nun te suse cchiù. –
‘A Morte cu’ n’arraggia ‘ncuorpo nun le putette dicere che no. E accussì se n’avette j’ cu na mano annanze e n’ata arete.
Passajene ‘e diec’anne e ‘a Morte turnaje a tuzzulià’ .
– Mustà’, mò nun voglio perdere manco nu poco ‘e tiempo. Accussì comme te truove vienetenne ca ‘sta vota nun me faje fesso. –
Mustaccio le rispunnette: – Sissignore, mò vengo; ma. si’ proprio na ‘nfamone si apprimma nun me faje mangià’ chelli doje fiche ca mò so’ spuntate ‘ncopp’a chill’arbere. Jammo, je so’ viecchio, cuogliammelle, famme chest’urdema grazia. –
‘A Morte le parette brutto ‘e le dice re ‘e no, e s’arrampecaje ‘ncopp’a l’arbere. Comme ‘a verette Mustaccio dicette:
– ‘A nomme ‘e Dio ‘a Morte nun pozza scennere ‘a copp’a l’arbere. –
Chesta cugliette ‘e fiche e facette pe’ scennere, ma se sentette azzeccata a chill’arbere e cu’ tutt”e sfuorze ca faceve, nun era capace ‘e se movere.
Allora Mustaccio, cu’ n’ata resatella ca facette j’ ‘nfreve ‘a Morte, dicette:
– Eh, haje voglia ‘e smanià’; si nun me dai n’ati diec’anne ‘e vita a lloco ‘ncoppa nun scinne cchiù. –
Accussì Mustaccio s’abbuscaje n’ati diec’anne ‘e vita e ‘a Morte se n’avetta j’ tutta scurnata.
Ma pure ‘sti diece anne passajene, e puntualmente ‘a Morte s’appresentaje. Nun vulette sapé’ nè sante e nè Maronne, s”o carrecaje ‘ncuollo e s”o purtaje. Strata facenne ‘a Morte penzaje: «E mò addò ‘o porto? Mò ‘o porto all’inferno.»
Arrivata ca fuje, tuzzuliaje:
– Chi è? – spiajene ‘e riavule.
– Song”a morte. –
– A chi ce puorte? –
– Mustaccio. –
– Vattenne, vattenne, chisto è chillo ca ce rumpette l’ osse.
Allora ‘a Morte jette ‘mparaviso. Tuzzuliaje e san Pietro spiàje:
Chi è? –
– So’ ‘a. Morte. –
– A chi puorte? –
– Mustaccio. –
– Mustaccio? Cà nun ce sta posto pe’ mariuncielle e pe’ ‘mhrugliune! –
‘A morte rispunnette:
– E addò ‘o porto. All’inferno ‘e riavule nun l’hanno vuluto! –
E san Pietro: – E c’aggia fà’; ccà dinto nun ce trase! –
Allora Mustaccio se sfasteriaje e dicette:
– A nomme ‘e Dio san Pietro ‘int’a ‘o zaino mio. –
‘Nnfrunchete, e san Pietro trasette ‘int’a ‘o zaino. Allora accumminciaje a alluccà’, ca vuleve ascì’, e ca nisciuno maje s’era permesso d”o trattà accussì.
San Pietro alluccave, Mustaccio strillave e ‘a Morte s’appiccecave cu’ tutt”e duje. Allora sentenne tutta chella ammujna ascette ‘o Maestro ca vulette sapé’ che steve succerenne.
– Maestro, – s’avutaje Mustaccio – verite si è cosa; ‘a morte me porta all’inferno e ‘e riavule nun me vonno pecché je ‘e rumpette l’osse; vengo cà e san Pietro nun me vo’ fà trasì’; e allora c’aggia fà’. Aggio ditto a nomme ‘e Dio san Pietro ‘int’a ‘o zaino mio. –
S’avutaje ‘o Maestro: – Va bene, ho capito. Ora fai uscire san Pietro dallo zaino e poi entrerai in paradiso. –
E accussì, doppo fatto pace cu’ san Pietro, Mustaccio se truvaje ‘o pusticiello suje ‘nparaviso.