Salta al contenuto

‘A cacaglia


  Ξ Lazzaro Napoletano » Storia, mito e … » Racconti Popolari » ‘A cacaglia  

‘Nce steva na vota na mamma ca teneva, na figlia cacaglia.
Nu giuvinotto se n’annammuraje e s”a vuleva spusà’.
‘A mamma, pe’ l’annasconnere chisto difetto, le dicette:
– Je t”a dongo, ma chesta se piglia scuorno ‘e parlà’. –
‘O giovane rispunnette: – Nun ‘mporta. – Pecché isso se faceva ‘ncapo ca doppo pigliata ‘a faceva parlà’.
Accussì se spusajene; ma ‘a mugliera nun vuleva dicere na parola.
‘O povero marito se verette sperzo. Jette ‘a du nu cumpare sujo e le facette conoscere comme isso teneva na mugliera ca nun parlava maje.
‘O cumpare le dicette: – Sa’ che vuo’ fa’? Falle nu pare ‘e scarpe strette strette. Chella ha da dicere: « tu che m’hé fatto? » E vire ca parla. –
‘O marito accussì facette; ma ‘a mugliera manco vulette parlà’.
Jette n’ata vota ‘a d”o cumpare pe’ ce cercà’ nu siconno cunsiglio, e chisto le dicette:
– Falle na vesta corta corta, e vire essa che fa. –
Chillo pover’ommo ‘nce ‘a facette, ma ‘a mugliera manco vulette parla’.
Jette n’ata vota ‘a d”o cumpare; chillo, sapenne chesto, cunzigliaje a ‘o marito ‘e se mettere aret”a porta; accussì, quanno chella traseva, isso ‘a faceva mettere appaura, e ‘a mugliera aveva dicere: « mamma mia ».
Ma manco ne ricavaje niente, pecche ‘a femmena nun dicette na parola.
Chillo povero marito jette n’ata vota ‘a d”o cumpare, e chisto le dicette:
– N’urdema cosa te rummane ‘e fà’. Fa beré’ ca si’ muorto, accussì chella t’ha da chiagnere, e tu ‘a siente ‘e parlà’. –
Na bella matina ‘o marito se mettette ‘ncopp”a ‘o lietto facenne ‘a parte d”o muorto.
‘A mugliera s”o crerette, e se mettette a chiagnere comme na funtana:
– Malito mio, malito; ‘e tappe attette attette, ‘a vetta totta totta, ‘a paù a me alet’a potta e tu ti’ muotto. –
‘O marito allora se susette e dicette:
– Ah, tu pe’ chesto nun vulive parlà’, pecche si’ cacaglia? N’ata vota ca nun parle te faccio na bella mazziata. –
E de chesta manera ‘o marito sentette ‘e parla ‘a mugliera.