Salta al contenuto

Cricche, Crocche e Manec’ancino


  Ξ Lazzaro Napoletano » Storia, mito e … » Racconti Popolari » Cricche, Crocche e Manec’ancino  

‘Nce stevene na vota tre mariuncielle ca se chiammavene uno Cricche, uno Crocche e n’ato Manec’ancino.
Nu iuorno facettene na scummessa pe’ vedé’ chi ‘e lloro era ‘o mariuolo cchiù fino.
Se mettettene ‘ncammino uno aret’a n’ato; Cricche ca ieva annanze vedette na cola ca cuvava ‘int’a ‘o nivo sujo, ‘ncopp”a cimma ‘e n’arbere, e subbeto dicette:
– Vulite abberé’ ca so’ capace ‘e levà’ ll’ove ‘a sott’a chella cola senza ca essa se n’addone? –
– Si, si, facc’abberé. – Dicettene ‘e cumpagne.
Ditto fatto, Cricche sagliette ‘ncopp’a l’arbere; e pe’ tramente arrubbava ll’ove a sott”a cola, Crocche le taglieje ‘e tacche ‘a sott”e scarpe e s”e nnascunnette ‘int’a ‘o cappello.
Ma primma ca se fosse mise ‘o cappiello ‘ncapa, Manec’ancino se l’era già arraffato.
Scennenne ‘a copp’a l’arbere Cricche dicette:
-‘O mariuolo cchiù fino songh’je, pecché aggi’arrubbate ll’ove ‘a sott’a cola. –
Rispunnette Crocche: – ‘O cchiù fino songh’je, pecchè t’aggio tagliato e tacche ‘a sott’e scarpe e nun te ne si’ addunato.
E accussì dicenne se levaje ‘o cappello pe’ le fà’ vedé’ ‘e tacche, ma cu’ na grande meraviglia nun ‘e truvaje.
Allora Manc’ancino dicette: – ‘O cchiù fino soiìgh’je, pecche t’aggi’arrubbate ‘e tacche ‘a ‘int’a ‘o cappello, e visto ca so’ ‘o cchiù fino me voglio spartere a vuje pecchè ce refonche.
E accussì, senza dicere bongiorno o bonasera, aizaje ‘ncuollo e se ne jette pe’ cunto sujo.
E, arrubbanne arrubbanne, s’astipaje tanta ‘e chella rrobba c’addeventaje ricco.
Cagnaje paese, se spusaje e arapette na puteca ‘e casadduoglio.
Chill’ati duje cumpagne, jenne arrubbanne tuorno tuorno, arrivamene a chisto paese e subbeto appizzajene l’uocchie ‘ncopp”a puteca ‘e Manec’ancino.
– Jammo dinto. – Dicette Cricche. – Chi ‘o sa’, putimme fà’ coccosa. –
Trasettene dinto, e truvanne ‘a mugliera sola, le dicettene:
– Bella signo’, ce vulite dà’ coccosa pe’ magnà’?
– Che vulite?
– Na fella ‘e casecavallo.
Pe’ tramente essa tagliava ‘o casecavallo, ‘e duje mariuole se guardavene attuorno pe’ vedé’ che se putevene arraffà’.
Vedettene appiso nu puorco squartato e se facettene segno ca dint”a nuttata s”o sarriane venute a pigla’.
‘A mugliera ‘e Manc’ancino, ca nun era fessa, s’addunaje d”e segne ca se facevene, ma se stette zitta, e quanno ‘o marito s’arritiraje, le cuntaje tutt”o fatto.
‘O marito, figlio ‘e ‘ntrocchia ca era, se magnaje subbeto ‘e maccarune e dicette:
– Chiste sarranno certamente Cricche e Crocche ca se vonno arrubbà’ ‘o puorco. E va bene! Mò ce penz’je.-
Pigliaje ‘o puorco, ‘o mettette ‘int”o furno e doppo se ne jette a cuccà’.
Quanno fuje notte Cricche e Crocche chianu chiano trasettene ‘int”a puteca pe’ s’arrubbà’ ‘o puorco; ma vide a ccà, guarda a llà, nun fujene capace d”o truvà’.
Allora Cricche che penzaje ‘e fà’? Zitto zitto s’accustaje a ‘o lietto d”a parte addó steve cuccata ‘a mugliera ‘e Manec’ancino e dicette:
– Muglíé’ je nun trovo cchìù ‘o puorco. Addó l’hé miso? –
‘A mugliera, credennese ca fosse ‘o marito, rispunnette:
– E duorme! Nun t’arricuorde ca l’hé miso ‘int”o furno?
E s’addurmette n’ata vota.
‘E duje cumpare jettene vicin’a ‘o furno, se pigliamene ‘o puorco e se ne jettene.
Pe’ primma ascette Crocche, po’ Cricche cu’ ‘o puorco ‘ncuollo.
Passanne p”o ciardino d”o casadduoglio, vedette ca ce stevene semmenate vruoccole p”a menesta; arrivaje a Crocche e le dicette:
– Torna ‘int’a ll’uorto ‘e Manec’ancino e fatte duie belli père ‘e vruoccole, accussì quanno arrivammo a casa ‘nc”e cucenamme ‘nzieme a na coscia ‘e puorco. –
Crocche turnaje arete e Cricche jette annanze.
Cunfromme Manec’ancino se scetaje, jette ‘e corza a vedé’ ‘int”o furno, e nun truvaje cchiù ‘o puorco.
Guardanne ‘int”o ciardino vedette a Crocche ca cuglieva ‘a menesta.
– Mò ce penz’je. – Dicette.
Pigliaje nu bello mazzo ‘e menesta ca teneve ‘int”a casa, e ascette ‘e corza senza se fà’ vedé’ a Crocche.
Arrivaje a Cricche ca cammenava cu’ ‘o puorco ‘ncuollo e le facette segno ca vuleva ‘o puorco.
Cunfromme avette ‘o puorco n’ata vota ‘mmano, Manec’ancino s’avutaje e se ne turnaje ‘e corza a casa.
Passato nu poco ‘e tiempo, Crocche arrivaje a Cricche cu’ ‘a menesta ‘mmano, e le dicette:
– E ‘o puorco addó l’hé miso? –
– ‘O tiene tu! –
– Je? je nun tengo niente! –
– Ma si mò mò te l’aggio miso ‘ncuollo! –
– E quanno? Tu m’hé mannato a cogliere ‘e vruoccole!
Accussi se facettene capace ca era stato Manec’ancino, e ca er’isso ‘o mariuolo cchiù fino.