Ξ Gennaro Agrillo » Viento ‘e mare » ‘E ffinte ‘e mammà
di (e voce) Gennaro Esposito
Quann’ero giuvinotto – m’arricordo –
‘o sudore custava poche sorde;
se l’accattava ‘a gente cu ‘e denare,
che a stiento ce facevano magnà.
Mammà,
quanno scenneva pe’ fa ‘a spesa:
“ogge -diceva – è finta genovese!…”
Finta, significava senza carne,
che allora nun putevemo accattà.
Ddoje pummarole sciacque, e mulignane,
e ce faceva ‘a finta parmiggiana;
n’uosso ‘e denucchio, ‘nzieme a nu mazzetto,
e asceva fora ‘o meglio consumè.
‘A meglia finta era ‘o crapetto a’ ‘o furno,
e ce ‘o faceva quase tutt”e juorne:
‘nzogna e patane, a’ ‘o posto d”o crapetto,
e po”o mannava a’ ‘o furno p”o ‘nfurnà.
E quanno ‘e sorde erano poche poche,
vullevano cepolle ‘ncopp”o ffuoco;
abbabbiate cu ddoje aulive nere,
addeventava … finto baccalà.
Sarrà succiesso, chisà quanta vote,
p”a scarsità d”a rrobba dint”o ruoto …
‘nzieme cu ‘o pane e ‘a ‘nzogna, ‘ncopp”o ffuoco,
pappuliavano ‘e llacreme ‘e mammà.
Fernevano ‘a dummeneca ‘sti finte
mammà a’ miseria nun ce ‘a deva vinta;
pe’ fa”o rraù spisso ‘mpignava ‘e panne,
e no pe’ vizio, ma era pe’ sfuca’.
Eppure ‘e tiempe ‘e mò, cu ll’abbundanza,
paricchia gente a “ffinta” tira ‘nnanze;
chi campa buono è sempe chi cumanna,
‘a “finta” lloro è chello ‘e ce aiutà …